వాహనదారులకు అలెర్ట్... టోల్‌గేట్ల దగ్గర ఫాస్టాగ్ కష్టాలు!!

SMTV Desk 2019-12-16 11:36:34  

కేంద్రం తీసుకొచ్చిన ఫాస్టాగ్ విధానంతో కష్టాలు మొదలయ్యాయి. తొలిరోజే టోల్‌గేట్ల దగ్గర ఫాస్టాగ్‌లు మొరాయిస్తే.. రెండో రోజు కూడా ఇబ్బందులు కొనసాగుతున్నాయి. వాహనాలకు ఫాస్టాగ్‌లు ఉన్నా అవి మొరాయించడంతో కిలోమీటర్ల పొడువున వాహనాలు నిలిచిపోతున్నాయి. తెలుగు రాష్ట్రాలతో పాటూ మిగిలిన కొన్ని రాష్ట్రాల్లో ఇదే సీన్ కనిపిస్తోంది. సోమవారం ఉదయం శ్రీకాకుళం జిల్లా నర్సన్నపేట మండలం మడపాం దగ్గర 16వ నెంబర్ హైవేపై ఉన్న టోల్‌గేట్ దగ్గర ఫాస్టాగ్‌లు పనిచేయడం లేదు. సాంకేతిక లోపంతో పనిచేయని ఇవి పనిచేయడం లేదని సిబ్బంది చెబుతున్నారు. దీంతో ఇరువైపులా కిలోమీటర్ల మేర నిలిచిపోయిన వాహనాలు నిలిచిపోయాయి.. వాహనదారులు తీవ్ర ఇబ్బందులు పడుతున్నారు. ఫాస్టాగ్ కార్డులు ఉన్నా టోల్‌గేట్ దగ్గర వాహనదారులు పడిగాపులు పడుతున్నారు. ఈ నెల 15 నుంచి దేశ వ్యాప్తంగా అన్ని హైవేలపై ఉండే టోల్‌గేట్ల వద్ద ఫాస్టాగ్ విధానం అమల్లోకి వచ్చింది. టోల్‌గేట్ల వద్ద వాహనాలు బారులు తీరే సమస్యను నివారించడం సహా, సిబ్బంది ఖర్చు తగ్గించుకొనే ఉద్దేశంతో ఫాస్టాగ్ విధానాన్ని తీసుకొచ్చారు. కొన్ని టోల్‌గేట్ల దగ్గర ఈ విధానం సిద్ధంకాకపోవడంతో వాహన దారులకు అక్కడక్కడా ఇబ్బందులు ఎదురవుతున్నాయి. టోల్‌ గేట్ల వద్ద పాస్టాగ్‌లేని వాహనదారులు టోల్‌ను నగదు రూపంలో చెల్లించేందుకు బారులు తీరుతున్నారు. రహదారిపై టోల్ గేట్ల వద్ద ఫాస్టాగ్ ఉన్న వాహన దారుల కోసం ఎక్కువ సంఖ్యలో లైన్లను కేటాయించారు. ఫాస్టాగ్ లేని వారి కోసం ఒకటి లేదా రెండు లైన్లకు అనుమతించారు. అత్యధిక సంఖ్యలో వాహనదారులు ఫాస్టాగ్ తీసుకోకపోవడంతో ఈ రద్దీ ఏర్పడింది. కొన్నిచోట్ల సాంకేతిక కారణలతో ఫాస్టాగ్‌లు పనిచేయక వాహనదారులు కష్టాలు పడుతున్నారు.