ప్రొఫెషనల్‌గా ఉండండి, అభినందన్‌లా కాదు

పాకిస్థాన్‌ సైనికులకు చిక్కి సురక్షితంగా దేశానికి తిరిగి వచ్చిన భారత వాయుసేన వింగ్ కమాండర్ అభినందన్‌‌ ఎంతోమందికి ఫేవరెట్ హీరోగా మారారు. శత్రువులకు వెన్నుచూపని ఆయన ధైర్యం పలువురికి స్ఫూర్తిదాయకంగా మారగా.. రియల్ హీరో అంటూ ఆయన బిరుదును సంపాదించుకున్నారు. అయితే అంతటి వీరుడైన ఆయనపై పాక్‌లోని కొంతమంది మాత్రం చిన్న చూపు చూస్తున్నారు. ఆయనను కించపరుస్తూ పాకిస్థాన్‌లోని ముల్తాన్‌లో ఉన్న ఓ కోచింగ్ సెంటర్ ఇటీవల ఓ ప్రకటనను తయారు చేసింది.

‘‘ప్రొఫెషనల్‌గా ఉండండి, అభినందన్‌లా కాదు’’ అంటూ ఆ సంస్థ ఓ ప్రకటనను తయారు చేసింది. అంతేకాదు ‘‘దీనిని కొన్ని మీడియాలు స్పైసీ న్యూస్‌గా తీసుకోవచ్చు. కానీ లోకల్‌ మార్కెట్‌ను ఆకర్షించడం కోసం మేము ఇలా చేశాం. మేము శాంతిని కోరుకుంటున్నాం’’ అంటూ ఆ సంస్థ సోషల్ మీడియాలో కామెంట్ పెట్టింది. అయితే ఈ ప్రకటనపై భారత నెటిజన్లతో పాటు కొందరు పాక్ నెటిజన్లు కూడా మండిపడుతున్నారు. ఇలాంటి ప్రకటనలు ఇచ్చే వారు ముందు ప్రొఫెషనల్‌గా ఉండాలని కొందరు నెటిజన్లు కామెంట్లు పెడుతున్నారు. బిజినెస్‌ను పెంచుకోవడం కోసం ఇలాంటి చీప్ ట్రిక్స్ చేయకూడదు అంటూ మరికొందరు అంటున్నారు.