కెప్టెన్ ను మార్చేయండి!
ప్రపంచకప్ టోర్నీలో పేలవ ప్రదర్శనతో లీగ్ దశలోనే వెనుదిరిగిన పాకిస్తాన్ ఇప్పుడు ఆ జట్టులో దిద్దుబాటు చర్యలకి దిగింది. దీంతో.. ఆ జట్టు కెప్టెన్సీ బాధ్యతల నుంచి సర్ఫరాజ్ అహ్మద్‌ని తప్పించాలని స్వయంగా టీమ్ హెడ్ కోచ్ మిక్కీ ఆర్థర్ ప్రతిపాదించినట్లు వార్తలు వస్తున్నాయి. భారత్‌తో జరిగిన లీగ్ దశ మ్యాచ్‌లో వికెట్ కీపింగ్ చేస్తూ సర్ఫరాజ్ ఆవలింతలు తీయడంతో.. అతని ఫిట్నెస్, సామర్థ్యంపై అప్పట్లో పెద్ద ఎత్తున చర్చ జరిగింది. ఇంగ్లాండ్‌ గడ్డపై 2017లో జరిగిన ఛాంపియన్స్ ట్రోఫీలో పాకిస్థాన్ జట్టుని విజేతగా నిలిపిన కెప్టెన్ సర్ఫరాజ్ అహ్మద్.. ఆ తర్వాత పూర్తి స్థాయిలో కెప్టెన్‌గా ఈ రెండేళ్లు కొనసాగాడు. కానీ.. టీ20ల్లో మినహా.. ఆ జట్టు‌కి ఎక్కువగా విజయాల్ని అందించలేకపోయాడు. తుది జట్టు ఎంపిక, ఫీల్డింగ్ మార్పుల్లో తికమకతో మొదటి నుంచి విమర్శలు ఎదుర్కొన్న సర్ఫరాజ్.. ఇటీవల తన పేలవ ఫిట్నెస్ కారణంగా అభిమానుల నుంచి అవమానాలు కూడా భరించాల్సి వచ్చింది. ఫిట్‌సెస్‌ విషయంలో టీమ్‌లోని ఆటగాళ్లకి ఆదర్శంగా నిలవాల్సిన కెప్టెన్.. ఇలా బొజ్జతో ఉండటమే పాకిస్థాన్ టీమ్ ఫిట్నెస్ ప్రమాణాలు ఏ స్థాయిలో ఉన్నాయో..? అర్థమవుతోందని మాజీ క్రికెటర్లు సైతం వరల్డ్‌కప్ టైమ్‌లో పెదవివిరిచారు. ఇటీవల కెప్టెన్‌గా సర్ఫరాజ్ విఫలమవడంతో అతని కెప్టెన్సీపై వేటు వేసి.. వన్డే, టీ20 జట్టు బాధ్యతల్ని షదాబ్ ఖాన్‌కి, టెస్టు టీమ్ పగ్గాల్ని బాబర్ అజామ్‌కి అప్పగించాలని పాకిస్థాన్ హెడ్ కోచ్ మిక్కీ ఆర్థర్ సూచించినట్లు తెలుస్తోంది. ప్రపంచకప్‌లో ఓటమిపై ఇటీవల సమీక్ష జరగగా.. అక్కడ పాకిస్థాన్ క్రికెట్ బోర్డు ఏర్పాటు చేసిన కమిటీకి మిక్కీ ఆర్థర్ కెప్టెన్సీ మార్పుపై తన అభిప్రాయాన్ని స్పష్టంగా చెప్పాడట. దీంతో.. సర్ఫరాజ్ కెప్టెన్సీపై వేటు పడటం ఖాయంగా కనిపిస్తోంది. కెప్టెన్సీ చేజారిన తర్వాత.. ఫామ్‌లో లేని సర్ఫరాజ్ టీమ్‌లో కొనసాగడం కూడా కష్టమే అన్న వాదనలు వినిపిస్తున్నాయి.
