నచ్చింది చెయ్...కానీ అడ్డదారుల్లో వెళ్లకు....అర్జున్‌కి సచిన్ సూచన

భారత క్రికెట్ దిగ్గజం సచిన్ టెండూల్కర్ తనయుడు అర్జున్ టెండూల్కర్‌ ప్రస్తుతం ముంబయి టీ20 లీగ్స్‌లో అకాశ్ టైగర్స్ టీమ్‌కి ఆడుతున్నాడు. టోర్నీలో భాగంగా శనివారం వాంఖడే వేదికగా సెమీఫైనల్ మ్యాచ్ జరగనుండగా.. అర్జున్‌తో కలిసి ప్రాక్టీస్ సెషన్‌కి సచిన్ హాజరయ్యాడు. ఈ నేపథ్యంలో.. అర్జున్‌కి ఏవైనా సూచనలు చేస్తున్నారా..? అని ప్రశ్నించగా.. సచిన్ సమాధానమిచ్చాడు. ‘క్రికెట్‌పై అర్జున్ చాలా మక్కువ చూపిస్తున్నాడు. అతని చిన్నతనం నుంచి నేను ఎప్పుడూ, ఏ విషయంలోనూ బలవంతం పెట్టలేదు. తొలుత కొన్నిరోజులు ఫుట్‌బాల్ ఆడాడు. ఆ తర్వాత అతని మనసు చెస్ మీదకి మళ్లింది. ఇప్పుడు క్రికెట్ ఆడుతున్నాడు. నేను అర్జున్‌కి చెప్పేది ఒక్కటే.. ‘‘నచ్చింది చెయ్.. కానీ.. అడ్డదారుల్లో వెళ్లకు’’ అని. ఇదే మాటని నా తండ్రి (రమేశ్ టెండూల్కర్) నాకు చెప్పాడు. ఇప్పుడు అర్జున్‌కి నేను చెప్తున్నా’ అని సచిన్ టెండూల్కర్ వెల్లడించాడు. భారత్ జట్టు బ్యాట్స్‌మెన్‌లకి 2017లోనే నెట్స్‌లో బౌలింగ్‌ చేసిన అర్జున్ టెండూల్కర్‌ తన వేగంతో అందర్నీ ఆశ్చర్యపరిచాడు. టీమిండియాకే కాదు.. భారత మహిళల జట్టుకి, ఇంగ్లాండ్ టీమ్‌కి కూడా నెట్స్‌లో అర్జున్ సాయపడ్డాడు. ఎడమచేతి వాటం పేసరైన అర్జున్‌కి బ్యాటింగ్‌ కంటే బౌలింగ్‌ అంటేనే ఎక్కువ ఇష్టమట..!