కొత్త ఫీచర్లతో బజాజ్ Bajaj Dominar 400

బజాజ్ మరో కొత్త బైక్ ను మార్కెట్లోకి తీసుకొచ్చింది. డామినర్ బైక్‌‌లో 2019 వెర్షన్‌గా వచ్చిన దీంట్లో కొత్త ఫీచర్లతో అప్‌డేట్ చేసింది. కంపెనీ కొత్త డామినర్‌లో అటు ఇంజిన్ పరంగా, ఇటు లుక్ పరంగా పలు మార్పులు చేసింది. 2019 డామినర్ బైక్ గ్రీన్, బ్లాక్ కలర్‌ ఆప్షన్‌లో అందుబాటులో ఉండనుంది. కంపెనీ బైక్ టెలిస్కోపిక్ ఫోర్క్స్ స్థానంలో అప్‌సైడ్ డైన్‌ ఫ్రంట్ సస్పెన్షన్ (యూఎస్‌డీ ఫ్రంట్ ఫోర్క్స్) ఫీచర్‌ను అమర్చింది. ఇన్‌స్ట్రుమెంట్ కన్సోల్‌లో కూడా మార్పులు చేసింది. డబుల్ బ్యారెల్ ఎక్స్‌హాస్ట్, కొత్త సైడ్ స్టాండ్ వంటి వాటిని జోడించింది. అలాగే రియర్ వ్యూ మిర్రర్లను రీడిజైన్ చేసింది. 2019 డామినర్‌లోనూ 373 సీసీ 4 స్ట్రోక్ సింగిల్ సిలిండర్ ఇంజినే అమర్చింది కంపెనీ. అయితే ఇంజిన్ మాగ్జిమమ్ పవర్ 39.9హెచ్‌పీ @ 8650 ఆర్‌పీఎంగా, ఇంజిన్ మాగ్జిమమ్ టార్క్ 35ఎన్ఎం @ 7000 ఆర్‌పీఎంగా ఉంటుంది. ఇదివరకటి వేరియంట్స్‌లో ఇంజిన్ మాగ్జిమమ్ పవర్ 35హెచ్‌పీ @ 8000 ఆర్‌పీఎంగా, ఇంజిన్ మాగ్జిమమ్ టార్క్ 35 ఎన్ఎం @ 6,500 ఆర్‌పీఎంగా ఉంది. అంటే కొత్త బజాజ్ డామినర్‌లో మరింత శక్తివంతమైన ఇంజిన్ ఉంటుంది. ఇకపోతే ఏబీఎస్ (యాంటీ లాక్ బ్రేకింగ్ సిస్టమ్) ఫీచర్ స్టాండర్డ్ ఫీచర్‌గా ఉంది. బైక్ ధర రూ.1,73,870గా (ఎక్స్‌షోరూమ్ ముంబై) ఉంది. ఇదివరకటి వేరియంట్లతో పోలిస్తే బైక్ ధర రూ.10,700 ఎక్కువ. బైక్‌లో 2 చానల్ ఏబీఎస్, 6 గేర్లు, 13 లీటర్ల ఫ్యూయెల్ ట్యాంక్ కెపాసిటీ వంటి ప్రత్యేకతలు ఉన్నాయి.