ఇండియన్ మార్కెట్లోకి ఎంట్రీ ఇవ్వనున్న హోండా సీబీఆర్150ఆర్

హోండా కంపెనీ మరో కొత్త బైక్ ను ప్రవేశపెట్టేందుకు సిద్దం అయ్యింది. కంపెనీ నూతన బైక్ సీబీఆర్150ఆర్ ను థాయ్‌లాండ్ మార్కెట్‌లో లాంచ్ చేసింది. దీని ధర దాదాపు రూ.2.15 లక్షలు. సీబీఆర్150ఆర్ బైక్‌లో డ్యూయెల్ చానల్ ఏబీఎస్ ఉంటుంది. ఇది యమహా ఆర్15 వీ3 బైక్‌కు గట్టి పోటీ ఇచ్చేలా కనిపిస్తోంది. ఇందులో కన్వెన్షనల్ ఫోర్క్స్ స్టాండర్డ్ ఫీచర్‌గా ఉంటాయి. కంపెనీ త్వరలోనే ఈ బైక్‌ను భారత్ మార్కెట్‌లోకి తీసుకువచ్చే అవకాశముంది. బైక్ డిజైన్ విషయానికి వస్తే.. ముందు భాగంలో రెండు ఎల్ఈడీ లైట్స్ ఉంటాయి. సీబీఆర్650ఆర్ బైక్‌ను ఇందుకు ప్రాతిపదికగా తీసుకున్నారు. ఫుల్ డిజిటల్ ఇన్‌స్ట్రుమెంట్ కన్సోల్ కూడా హోండా బ్రాండ్ పేరును తెలియజేస్తోంది. సీబీఆర్150ఆర్ గ్రౌండ్ క్లియరెన్స్ 166ఎంఎం. అంటే ఈ బైక్‌ను రోజువారీ కార్యకలాపాలకు ఉపయోగించొచ్చు. ఈ బైక్‌లో 149 సీసీ లిక్విడ్ కూల్డ్ ఇంజిన్ ఉంటుంది. మాగ్జిమమ్ పవర్ 17.1 హెచ్‌పీ@9000 ఆర్‌పీఎం. మాగ్జిమమ్ టార్క్ 14.4 ఎన్ఎం@7000 ఆర్‌పీఎం. ఆరు గేర్లు ఉంటాయి. ఫ్యూయెల్ ట్యాక్ సామర్థ్యం 12 లీటర్లు. బైక్ టాప్ స్పీడ్ గంటకు 135 కిలోమీటర్లు.