టీంఇండియాను దెబ్బతీసిన భారీకాయుడు

SMTV Desk 2019-08-31 13:01:45  

అరంగేట్రం మ్యాచ్‌లోనే వెస్టిండీస్ టీమ్ భారీకాయుడు రకీమ్ కార్న్‌వాల్ తన సత్తా చాటాడు. శుక్రవారం రాత్రి ఆరంభమైన రెండో టెస్టు మ్యాచ్‌లో చతేశ్వర్ పుజారా వికెట్ పడగొట్టిన రకీమ్.. స్లిప్‌లో రెండు అద్భుతమైన క్యాచ్‌లను కూడా అందుకున్నాడు. తన స్పిన్ బౌలింగ్‌తో కెప్టెన్ విరాట్ కోహ్లీని సైతం కాసేపు ఇబ్బందిపెట్టిన ఈ 140 కిలోల భారీ క్రికెటర్.. ఒకానొక దశలో వికెట్ల ముందు కోహ్లీని దొరకబుచ్చుకునేలా కనిపించాడు. మొత్తంగా.. 6.6 అడుగుల ఈ విండీస్ ఆజానుబాహుడు.. టెస్టు క్రికెట్‌‌లో ఆడిన అత్యంత బరువైన క్రికెటర్‌గా సరికొత్త రికార్డ్ నెలకొల్పాడు. ఇప్పటి వరకూ ఆస్ట్రేలియా మాజీ క్రికెటర్ ఆర్మీస్ట్రాంగ్ 139 కిలోల బరువుతో అగ్రస్థానంలో ఉండగా.. తాజాగా అతడ్ని కార్న్‌వాల్ వెనక్కి నెట్టాడు. దేశవాళీ క్రికెట్‌లో నిలకడగా రాణిస్తున్న రకీమ్ కార్న్‌వాల్‌ని విండీస్ బోర్డు టెస్టుల్లోకి ఎంపిక చేయడంతో అందరూ ఆశ్చర్యపోయారు. 140 కిలోల బరువు ఉన్న క్రికెటర్ టెస్టుల్లో ఆడటమేంటి..? అంటూ హేళన చేశారు. కానీ.. తన అరంగేట్రం మ్యాచ్‌లోనే పుజారా వికెట్‌తో వారికి ఈ భారీకాయుడు బదులిచ్చాడు. టెస్టు స్పెషలిస్ట్ బ్యాట్స్‌మెన్‌గా పేరొందని పుజారా (6: 25 బంతుల్లో) .. కార్న్‌వాల్ విసిరిన బంతిని కట్ షాట్‌తో పాయింట్‌ దిశగా తరలించేందుకు ప్రయత్నించాడు. కానీ.. బంతి నేరుగా వెళ్లి ఫీల్డర్ బ్రూక్స్ చేతుల్లో పడింది. అంతర్జాతీయ క్రికెట్‌లో కార్న్‌వాల్‌కి ఇదే తొలి వికెట్‌కాగా.. మ్యాచ్‌లో అతను వేసిన మూడో ఓవర్‌లోనే ఈ వికెట్‌ దక్కడం కొసమెరుపు. మ్యాచ్‌లో కెప్టెన్ విరాట్ కోహ్లి (76: 163 బంతుల్లో 10x4)ని కూడా ఆరంభంలోనే కార్న్‌వాల్ దాదాపు ఔట్ చేసేసేలా కనిపించాడు. ఈ భారీకాయుడు విసిరిన బంతిని ముందుకు ఫుష్ చేసుందుకు కోహ్లీ ప్రయత్నించగా.. బంతి అతని బ్యాట్‌కి అందకుండా నేరుగా వెళ్లి ఫ్యాడ్స్‌ని తాకింది. దీంతో.. ఎల్బీడబ్ల్యూ ఔట్ కోసం కార్న్‌వాల్ అప్పీల్ చేయగా.. ఫీల్డ్ అంపైర్ తిరస్కరించాడు. దీంతో.. విండీస్ కెప్టెన్ హోల్డర్ రివ్యూ కోరాడు. కానీ.. బంతి వెంట్రుకవాసిలో వికెట్లకి దూరంగా వెళ్తున్నట్లు కనిపించడంతో కోహ్లీ ఊపిరి పీల్చుకున్నాడు.