ఘనంగా ప్రపంచకప్ ప్రారంభ వేడుకలు

ఐసిసి ప్రపంచకప్ 2019 ప్రారంభ వేడుకలు బకింగ్ హాల్‌కి సమీపంలో ఉన్న లండన్‌ మాల్‌లో బుధవారం ఘనంగా జరిగాయి. క్రికెట్, సంగీతం, వినోదం కలబోతగా.. సంబరాలు జరిపారు. ఈ వేడుకల్లో మాజీ క్రికెటర్లు, మరికొందరు ప్రత్యేక అతిథులు పాల్గొన్నారు. దాదాపు 4 వేల మంది అభిమానులు ఈ వేడుకకు హాజరయ్యారు. ముందుగా ఈ టోర్నీ ఆడుతున్న పది దేశాల కెప్టెన్లను ఒకరి తర్వాత మరొకరిని వేదికపైకి ఆహ్వానించారు. అనంతరం పది దేశాలకు చెందిన మాజీ క్రికెటర్లు, ప్రముఖులతో అరవై సెకన్ల పాటు సాగే క్రికెట్ టోర్నమెంట్ నిర్వహించారు. విండీస్ దిగ్గజ క్రికెటర్ వివియన్ రిచర్డ్స్, యొహాన్ బ్లేక్ కలిసి 60 సెకన్ల ఛాలెంజ్‌ను ప్రారంభించారు. ఒక్కో దేశానికి చెందిన ఇద్దరు మాజీ క్రికెటర్లు ఈ ఛాలెంజ్‌లో పాల్గొన్నారు. భారత్ నుంచి అనిల్ కుంబ్లే, ఫర్హాన్ అక్తర్ పాల్గొనగా.. పాక్ నుంచి నోబెల్ శాంతి పురస్కార విజేత మలాలా యుసఫ్ జాయ్ పాల్గొనడం విశేషం.60 సెకన్ల ఛాలెంజ్‌లో ఆతిథ్య ఇంగ్లాండ్ 74 పాయింట్లతో అగ్రస్థానంలో నిలవగా.. ఆస్ట్రేలియా 69 రన్స్‌తో రెండో స్థానంలో నిలిచింది. భారత్ 19 రన్స్‌తో చివరి స్థానానికి పరిమితమైంది. అంతకు ముందు విరాట్ కోహ్లి సహా... వరల్డ్ కప్‌లో తలపడుతున్న వివిధ జట్ల కెప్టెన్లు బకింగ్‌హమ్‌ ప్యాలెస్‌లో క్వీన్ ఎలిజబెత్‌ను కలిశారు.మే 30 నుంచి ప్రారంభం కానున్న వరల్డ్ కప్ తొలి మ్యాచ్‌లో ఇంగ్లాండ్, దక్షిణాఫ్రికా జట్లు తలపడనున్నాయి. జూన్ 5న భారత్.. దక్షిణఫ్రికాతో మొదటి మ్యాచ్ ఆడనుంది.