ప్రేక్షకులు పెట్టిన పేరు: ఎన్టీఆర్, చరణ్, రాజమౌళిని మెప్పిస్తాయా?

హైదరాబాద్, మే 01: ప్రస్తుతం టాలీవుడ్‌లో క్రేజీ మల్టీస్టారర్ ఏదైనా ఉందంటే అది ఎస్.ఎస్.రాజమౌళి RRR అనే చెప్పాలి. సినిమాను ప్రకటించిన నాటి నుంచి నేటి వరకూ తెలుగు రాష్ట్రాల్లో ఇదే హాట్ టాపిక్. కాగా ఎన్టీఆర్, రామ్ చరణ్, రాజమౌళి పేర్లలో ‘R’ అక్షరాలను తీసుకొని RRR అనే వర్కింగ్ టైటిల్‌ను ఈ సినిమాకు పెట్టారన్న విషయం విదితమే.

అయితే, ఇదే ఒరిజినల్ టైటిల్ అని.. దీన్ని విస్తరించి ఉప శీర్షికగా ఒక్కో భాషలో ఒక్కోటి పెడతామని గతంలో నిర్వహించిన ప్రెస్ మీట్‌లో దర్శకుడు రాజమౌళి చెప్పారు. అంతేకాకుండా ఈ సినిమాకు సబ్ టైటిల్స్‌ను ప్రేక్షకులే సూచించాలని కూడా కోరారు.

మూవీ సబ్ టైటిల్స్‌ను సూచించాలని RRR మూవీ అధికారిక ట్విట్టర్ ఖాతా నుంచి కూడా ప్రేక్షకులను చిత్ర యూనిట్ కోరింది. దీంతో చాలా మంది తమకు తోచిన టైటిల్స్‌ను సూచించారు. తెలుగు, హిందీ, తమిళం, మలయాళం, కన్నడ ఇలా అన్ని భాషల నుంచి ట్విట్టర్‌లో టైటిళ్ల వర్షం కురిసింది. ఈ వర్షంపై తాజాగా చిత్ర యూనిట్ స్పందించింది. కొన్ని టైటిళ్లను తీసుకొని వాటిని ఒక ఇమేజ్ రూపంలో తయారుచేసి ట్విట్టర్‌లో పెట్టింది.

"అన్ని భాషలకు సంబంధించి చాలా మంది RRR విస్తరించిన టైటిళ్లను పంపించారు. మేం అడిగిన రోజు నుంచి నేటి వరకు టైటిల్‌తో చాలా మంది ముందుకొచ్చారు. వాటిలో కొన్ని శక్తివంతంగా ఉన్నాయి. మరికొన్ని ఇంకా బలంగా ఉన్నాయి. ఇంకొన్ని ఆలోచింపజేసే విధంగా ఉన్నాయి. వాటిలో కొన్ని మాకు బాగా నచ్చాయి! ఇంకా పంపిస్తూనే ఉండండి. ఎవరికి తెలుసు, మీ టైటిలే RRR అసలు టైటిల్ కావచ్చు!" అని ట్వీట్‌లో చిత్ర యూనిట్ పేర్కొంది.

రఘుపతి రాఘవ రాజారాం, రామ రావణ రణరంగం, రాజ్యం రణం రక్తం, రాముడు రుద్రుడు రణరంగం, రామ రాజ్య రక్షకులు, రోషం రౌద్రం రాజసం, రణం రౌద్రం రాజసం, రణ రామ రాజు, రాజ్యం కోరని రాజుల రణగాధ, రామభీమ రణరంగం......ఇవే ప్రేక్షకులు సూచించిన టైటిల్స్.