కెప్టెన్సీ నుంచి తప్పుకోనున్న దినేష్ కార్తీక్!
కోల్‌కతా: కోల్‌కతా నైట్రైడర్స్ జట్టు కెప్టెన్ దినేష్ కార్తీక్‌ని కెప్టెన్సీ నుంచి తప్పించేందుకు యాజమాన్యం అనుకుంటున్నట్లు సమాచారం. ఇదివరకే వరుస ఓటముల నేపథ్యంలో.. రాజస్థాన్ రాయల్స్ ఫ్రాంఛైజీ తమ టీమ్ కెప్టెన్సీ బాధ్యతల నుంచి అజింక్య రహానెని తప్పించి స్టీవ్‌స్మిత్ చేతికి పగ్గాలు అప్పగించిన విషయం తెలిసిందే. దీంతో.. మూడు మ్యాచ్‌ల్లో టీమ్‌ని నడిపించిన స్మిత్.. రెండింటిలో విజయాల్ని అందించాడు. అయితే ఇదే తరహాలో కోల్‌కతా కూడా ఆలోచిస్తున్నట్లు తెలుస్తుంది. తాజా సీజన్‌లో 11 మ్యాచ్‌లాడిన కోల్‌కతా నైట్రైడర్స్ జట్టు నాల్గింటిలో గెలిచి.. ఏకంగా ఏడు మ్యాచ్‌ల్లో ఓడిపోయింది. ఇంకా ఆశ్చర్యకరమైన విషయం ఏంటంటే.. ఆ జట్టు చివరిగా ఆడిన ఆరు మ్యాచ్‌ల్లోనూ చిత్తుగా ఓడింది. సుదీర్ఘ ఐపీఎల్ చరిత్రలో కోల్‌కతా ఈ తరహాలో ఎప్పుడూ తడబడలేదు. దీంతో.. ఇప్పటికే ప్లేఆఫ్ అవకాశాల్ని సంక్లిష్టం చేసుకున్న ఆ జట్టు కనీసం.. కనీసం ప్లేఆఫ్ రేసులో నిలవాలంటే మిగిలిన మూడు మ్యాచ్‌ల్లోనూ తప్పక గెలవాలి. బ్యాటింగ్‌లో క్రిస్‌లిన్, నరైన్, నితీశ్ రాణా, ఆండ్రీ రసెల్, దినేశ్ కార్తీక్ మెరుగ్గా ఆడుతున్నా.. బౌలింగ్‌లో తేలిపోతున్న కోల్‌కతా వరుస మ్యాచ్‌ల్ని చేజార్చుకుంటోంది. ముఖ్యంగా.. యువ పేసర్లు ప్రసీద్‌ని సమర్థంగా వినియోగించుకోవడంలో కెప్టెన్ కార్తీక్ ఫెయిలవుతుండగా.. అగ్రశ్రేణి బౌలర్ కుల్దీప్ యాదవ్‌ని చివరి రెండు మ్యాచ్‌ల్లోనూ రిజర్వ్ బెంచ్‌పై కూర్చోబెట్టి విమర్శలు ఎదుర్కొన్నాడు. మ్యాచ్ వ్యూహాలు, బ్యాటింగ్ ఆర్డర్‌లో లోపాలు, స్లాగ్ ఓవర్లలో ధారాళంగా పరుగులిచ్చే బలహీనత కోల్‌కతాని ఉక్కిరిబిక్కిరి చేస్తున్నాయి. ఈ నేపథ్యంలో.. కెప్టెన్సీ మార్పుతో ఏమైనా ప్రయోజనం ఉంటుందా..? అని కోల్‌కతా ఫ్రాంఛైజీ యోచిస్తున్నట్లు తెలుస్తోంది. ఒకవేళ దినేశ్ కార్తీక్‌ని కెప్టెన్సీ నుంచి తప్పిస్తే.. ఆండ్రీ రసెల్, క్రిస్‌లిన్, నితీశ్ రాణా రేసులో ఉండనున్నారు.కెప్టెన్సీ మార్పుపై వస్తున్న వార్తల గురించి దినేశ్ కార్తీక్ మాట్లాడుతూ ‘మ్యాచ్ ఫలితాలు ఇలా వరుసగా వ్యతిరేకంగా వస్తుంటే.. ఇలాంటి ప్రశ్నలు రావడం సహజం. నేను పరిస్థితిని అర్థం చేసుకోగలను. కానీ.. ఒక జట్టుగా మేము అత్యుత్తమంగా ఆడేందుకు ప్రయత్నిస్తున్నాం’ అని సమాధానమిచ్చాడు.
