జిమ్నాస్టిక్స్ చేస్తూ రెండు కాళ్ళూ విరగ్గొట్టుకున్న క్రీడాకారిణి

జిమ్నాస్టిక్స్ క్రీడలో ఎన్నో విన్యాసాలు చేస్తూ ప్రాణాలకు తెగిస్తూ ప్రదర్శిస్తుంటారు. ఈ క్రీడలో అనేక ప్రమాదాలు చోటుచేసుకుంటాయి. చిన్నప్పటినుంచే ఈ క్రీడలో ప్రావీణ్యం సంపాదించినా ఒక్కోసారి టైమ్ బాగోపోతే గాయాలపాలు కావాల్సి వస్తుంది. జమ్నాస్టిక్స్‌ను ప్రాణంగా భావించే ఓ క్రీడాకారిణి తన రెండు కాళ్లను విరగ్గొట్టుకొని కెరీర్‌కే గుడ్‌బై చెప్పింది. అమెరికాలో ఆబర్న్ యూనివర్సిటీకి చెందిన సమంతా సెరియో అనే జిమ్నాస్ట్.. బేటన్ రోగ్ రీజనల్ పోటీల్లో పాల్గొంది. ఫస్ట్ రౌండ్ చేస్తున్న సమయంలో ఆమె ఎగిరి మ్యాట్ పై ల్యాండ్ అయ్యింది. కానీ అదే సమయంలో ల్యాండింగ్ అదుపు తప్పి రెండు మోకాళ్ల వద్ద విరిగిపోయాయి. నొప్పితో విలవిలలాడిన సమంత కూర్చున్న చోటు నుంచి లేవలేకపోయింది. డాక్టర్లు వచ్చి ఆమెను స్ట్రెచర్‌పై ఆసుపత్రికి తీసుకు వెళ్లారు. సమంత సరైన శిక్షణ లేకుండా హ్యాండ్‌స్ప్రింగ్ ఫ్రంట్ ప్లిప్ చేసి ఉండవచ్చని అందువల్లే కాళ్లు విరిగిపోయాయని జిమ్నాస్టిక్ నిపుణులు అభిప్రాయపడుతున్నారు. ఆసుపత్రి బెడ్‌పై ఉన్న ఆరోజే జిమ్నాస్టిక్స్‌కు గుడ్‌బై చెబుతున్నట్లు ప్రకటించింది. గత 18 ఏళ్లుగా దీన్నే కెరీర్‌గా భావించానని.. దురదృష్టం కొద్ది ఈ రోజు ఇలా అయిందని వివరించింది. తనకు ఇష్టమైన ఆటకు దూరమవుతున్నందుకు బాధగా ఉందని పేర్కొంది.