ఆసుపత్రిలో దారుణం : మహిళను నిల్చోబెట్టి కాన్పు చేసిన ఆసుపత్రి సిబ్బంది

గుజరాత్, మార్చ్ 25: గుజరాత్ లోని ఓ ఆసుపత్రిలో దారుణం చోటు చేసుకుంది. కాన్పు కోసం వచ్చిన మహిళను నిల్చోబెట్టి మరి ప్రసవం చేశారు ఆసుపత్రి సిబ్బంది. పూర్తి వివరాల ప్రకారం గుజరాత్ లోని బనస్కాంత జిల్లాలో రామీ బెన్ అనే మహిళ నెలలు నిండడంతో తన అత్తగారితో కలిసి ఆసుపత్రికి వచ్చింది. అయితే అక్కడ ఉన్న నర్సు ఎంతో నిర్లక్ష్యంగా వ్యవహరించి.. రామీ బెన్ ను ఓ ఇనుప కడ్డీ పట్టుకోమని చెప్పి అక్కడిక్కడే పురుడు పోసిందట. అంతేకాదు ప్రసూతి తాలూకు రక్తాన్ని కూడా రామీ బెన్ చీరతోనే తుడిపించి మానవత్వాన్ని కించపరిచేలా చేసిందట. ఇక ఈ విషయం తెలుసుకున్న రామీబెన్ బంధువులు ఆసుపత్రి ఎదుట ధర్నాకు దిగినట్లు తెలుస్తోంది. మరోవైపు అక్కడ ఉన్న సీనియర్ డాక్టర్ ఇలాంటి అమానవీయ ఘటనలు తమ ఆసుపత్రిలో ఎప్పుడూ జరగలేదని తప్పును కప్పిపుచ్చుకునే ప్రయత్నం చేసినట్లు తెలుస్తోంది. కానీ అక్కడ ఉన్న ప్రజలు మాత్రం గతంలోనూ ఇలాంటి ఘటనలు ఈ ఆసుపత్రిలో జరిగాయని ఆరోపిస్తున్నారు.