డిష్ టీవీ 'మేరా అప్నా ప్యాక్'....రూ.153కు అన్‌లిమిటెడ్ ఛానళ్లు!

న్యూఢిల్లీ, మార్చ్ 08: ఈ మధ్య టెలికం రెగ్యులేటర్ ట్రాయ్ ప్రవేశపెట్టిన కొత్త టారిఫ్ నిబంధనల వల్ల కేబుల్ టీవీ సబ్‌స్క్రైబర్లలో ఆందోళనలు నెలకొన్న సంగతి తెలిసిందే. అయితే ఈ నేపథ్యంలో డీటీహెచ్ సర్వీస్ ప్రొవైడర్లు బేస్ ప్యాక్‌లోనే అపరిమిత ఎఫ్‌టీఏ (ఫ్రీ టు ఎయిర్) ఛానళ్లను అందిస్తున్నాయి. వాస్తవానికి బేస్ ప్యాక్‌ ప్లాన్ల మార్పు అనేది మొదట్లో టాటా స్కైతో ప్రారంభమైంది. కాని ఇప్పుడు వివధ రకాల ప్రొవైడర్లు కూడా ఇదే మార్గంలో వెళ్తున్నారు. తాజాగా ఇప్పుడు డిష్ టీవీ కూడా ఈ జాబితాలో చేరింది. మేరా అప్నా ప్యాక్ పేరుతో కొత్త బేస్ ప్యాక్ ఆవిష్కరించింది. దీని కోసం రూ.153 చెల్లించాలి. ఈ ప్యాక్‌లో డిష్ టీవీ సబ్‌స్క్రైబర్లు అన్‌లిమిటెడ్ ఎఫ్‌టీఏ ఛానళ్లను పొందొచ్చు. వీటికి అదనపు నెట్‌వర్క్ కెపాసిటీ చార్జీలు ఉండవు. అయితే దీని కోసం కస్టమర్ ఏదైనా పే ఛానల్‌ను ఎంపిక చేసుకోవాల్సి ఉంటుంది. డిష్ టీవీ సబ్‌స్క్రైబర్లకు ఇది నిజంగా అదిరిపోయే వార్తే. అయితే దూరదర్శన్ 25 ఛానళ్లకు నెట్‌వర్క్ కెపాసిటీ ఫీజు (ఎన్‌సీఎఫ్) వర్తిస్తుంది. ప్రస్తుతం యూజర్లు తొలి 100 ఛానళ్లకు రూ.153 చెల్లిస్తున్నారు. పెయిడ్ ఎస్‌డీ, హెచ్‌డీ, ఎఫ్‌టీఏ ఛానళ్ల నుంచి వీటికి ఎంపిక చేసుకోవచ్చు. వీటిల్లో 25 దూరదర్శన్ ఛానళ్లు ఉండాలి. ఇప్పుడు డీష్ టీవీ కొత్త ప్యాక్ వల్ల వంద ఛానళ్ల పరిమితి దాటినా కూడా ఎఫ్‌టీఏ ఛానళ్లపై ఎలాంటి చార్జీలు ఉండవు. దీని ప్రకారం చూస్తే వంద ఛానళ్ల కన్నా తక్కువ చూసే వారి బిల్లులో ఎలాంటి మార్పు లేకపోవచ్చు. అయితే వంద ఛానళ్లకన్నా ఎక్కువ చూసే యూజర్ల బిల్లు మాత్రం దిగివస్తుంది. మరోవైపు డిష్ టీవీ ఎఫ్‌టీఏ ఛానళ్లను వివిధ కేటగిరిలుగా విభజించింది. వీటిల్లో బీఎస్‌టీ నార్త్ విత్ 189 ఛానల్స్, బీఎస్‌టీ హిందీ విత్ 99 ఛానల్స్, బీఎస్‌టీ మరాఠీ అండ్ గుజరాతీ విత్ 84 ఛానల్స్, బీఎస్‌టీ బంగ్లా ఒడియా విత్ 83 ఛానల్స్, బీఎస్‌టీ డీడీ ప్యాక్ విత్ 25 ఛానల్స్ వంటివి ఉన్నాయి.