హైదరాబాద్, జనవరి 30: గౌతం తిన్ననూరి దర్శకత్వంలో నాచురల్ స్టార్ నాని హీరోగా వస్తున్న చిత్రం జెర్సీ . ఇప్పటికే ఈ సినిమా నుండి ఓ టీజర్ విడుదల చేసింది చిత్ర బృందం. అయితే ఈ టీజర్ కు ప్రేక్షకుల నుండి మంచి రెస్పాన్స్ రావడంతో సినిమాపై భారీ అంచనాలు పెట్టుకున్నారు. ఈ సినిమాలో నాని వయస్సు పై బడిన క్రికెట్ బ్యాట్ పట్టి విజయాలు సాధించే ఆటగాడిగా కనిపించబోతున్నాడు. అయితే ఈ సినిమా కోసం నాని ఎలాంటి రెమ్యునరేషన్ తీసుకోలేదట. బదులుగా సినిమాకు వచ్చే లాభాల్లో వాటా తీసుకోవాలని నిర్ణయించుకున్నాడు.
ఈ క్రమంలో అతడి హయ్యెస్ట్ రెమ్యునరేషన్ దక్కుతుందని సమాచారం. ఈ సినిమా ద్వారా దాదాపు రూ.10 కోట్ల వరకు నానికి మిగులుతుందని తెలుస్తోంది. ఇప్పటికే సినిమా డిజిటల్, శాటిలైట్, హిందీ డబ్బింగ్ రైట్స్ ను భారీ మొత్తానికి అమ్మారు. ఇక థియేట్రికల్ రైట్స్ బిజినెస్ రూ.50 కోట్ల వరకు జరుగుతుందని అంచనా వేస్తున్నారు. ఫిబ్రవరిలో ఈ సినిమా షూటింగ్ పూర్తి కానుంది. ఏప్రిల్ లో సినిమాను ప్రేక్షకుల ముందుకు తీసుకురావడానికి సన్నాహాలు చేస్తున్నారు. సితారా ఎంటర్టైన్మెంట్స్ బ్యానర్ పై రూపొందుతోన్న ఈ సినిమాకి అనిరుద్ సంగీతం అందిస్తున్నారు. శ్రద్ధాశ్రీనాథ్ సినిమాలో హీరోయిన్ గా నటించనుంది.