మాజీ కేంద్ర మంత్రి పి.చిదంబరానికి ఊరట

కాంగ్రెస్ సీనియర్ నేత, మాజీ కేంద్ర మంత్రి పి. చిదంబరానికి ఢిల్లీ హైకోర్టులో గురువారం ఊరట లభించింది. ఐఎన్ఎక్స్ మీడియా కేసులో ఆయనను నవంబరు 29 వరకు అరెస్టు చేయరాదని ఆదేశాలు జారీ చేసింది.

యూపీఏ-1 ప్రభుత్వంలో పి. చిదంబరం ఆర్థిక మంత్రిగా పని చేసిన కాలంలో ఎయిర్‌సెల్ - మ్యాక్సిస్, ఐఎన్ఎక్స్ మీడియా సంస్థలకు విదేశీ పెట్టుబడుల ప్రోత్సాహక మండలి అనుమతులు లభించాయి. ఈ అనుమతుల మంజూరులో అక్రమాలు జరిగినట్లు సీబీఐ ఆరోపించింది.

2007లో ఐఎన్ఎక్స్ మీడియా సంస్థ రూ.305 కోట్ల మేరకు విదేశీ నిధులను స్వీకరించిందని ఆరోపిస్తూ గత ఏడాది మే 15న సీబీఐ ఎఫ్ఐఆర్ నమోదు చేసింది. ఈ కేసులో చిదంబరం కుమారుడు కార్తి చిదంబరం కూడా ఫిబ్రవరి 28న అరెస్టయ్యారు. ఆయన రూ.10 లక్షలు స్వీకరించినట్లు సీబీఐ ఆరోపించింది. ఆయనకు మార్చి 23న బెయిలు మంజూరైంది.